Оҕону кыра сааһыттан аҕа саастаах дьоҥҥо убаастабылы, ытыктабылы, үтүө сыһыаны иҥэрэр сыаллаах "Үтүө дьыала - үтүө сыһыан" декада Е.П.Сивцев аатынан 2 Хомустаах орто оскуолатыгар хаһыс да сылын ыытыллар. Быйылгы үөрэх дьылыгар, алтынньы 1 күнүттэн алтынньы 10 күнүгэр диэри ыытыллынна. Декада чэрчитинэн араас хабааннаах тэрээһиннэр ыытылыннылар:

1. 1-11 кылаас үөрэнээччилэрэ нэһилиэкпит  14 ытык кырдьаҕаһыгар дьиэлэригэр сылдьан эҕэрдэлээтилэр. Ытык мааны кырдьаҕастарбытыгар бурдук, оҕуруот аһын (помидор, патиссон), үөрэнээччилэр бэйэлэрэ оҥорбут оҥоһуктарын бэлэх ууннулар;

2. "Үтүөнү оҥор" диэн санаанан салайтаран, 68 үөрэнээччи нэһилиэк аҕа саастаах олохтоохторугар үлэнэн көмө оҥордулар. Ол курдук, хортуоска хостооһунугар, кыстык маһы бэлэмнээһиҥҥэ сырыттыллар;

3. Нэһилиэккэ ыытыллыбыт  "Дорообо, көмүс күһүн" диэн эбээлэрбитигэр, эһээлэрбитигэр, аҕам саастаахтарга анаммыт тэрээһиҥҥэ оскуола үөрэнээччилэрин Президенэ Копырина Сахаяна, 6, 10  кылаас үөрэнээччилэрэ ырыа ыллаан, үнкүү үҥкүүлээн бар дьоннорун эҕэрдэлээтилэр.

Саха тылын, литературатын учуутала Павлова Анна Николаевна