Алтынньы 9 күнүгэр нэһилиэк сынньалаңын киинигэр а5а саастаахтар күннэрэ тэрээһиннээхтик ыытылынна. Бу дьоро киэһэни сынньалаң киинин директора композитор-мелодист Меркулов А.П. уонна киин уус-уран салайааччыта Л.А.Максимова, библиотекарь Л.В.Слепцова иилээн-са5алаан ыыттылар. Саала иһэ киэргэнэн, ситэн-хотон киһи хара5ар быра5ыллар буолбут. Тула бырааһынньыктыы толору астаах остуоллар ыалдьыттары көрүстүлэр. Биэчэр хаһаайката кырдьа5астар сүбэлэрин салайааччыта М.И.Максимова 14 сыл устата үлэлээн кэлбитин туоһулуур элбэх ахсааннаах фотостендэлэр ыйаммыттара дьон бол5омтотун тарта. Стендэлэргэ арыллыбыттар – ыһыахтар, кыайыы күннэрэ, саңа дьыл, араас хайысхалаах тэрээһиннэр сырдатыллыбыттар.

Мотрена Ивановна 14 сыл устата үлэлээбит үлэтин сиһилии отчуоттаата. Кыайыы 70 сылын көрсө араас хайысхалаах тэрээһиннэр ыытылыннылар. Ол курдук Кыайыы күнүгэр тыыл ветераннарыгар, сэрии сылларын о5олоругар анал знактар туттарыллыбыттар. Нэһилиэк, улуус ытыктанар кырдьа5ас ыаллара Иннокентий Иннокентьевич, Акулина Ильинична Олесовтар ыал буолан олорбуттара 65 сылынан Россия президенэ Путин үрдүк на5араадатын «Верность и любовь» мэтээлин туттулар, Бочуот кинигэтигэр киирдилэр. Кыаммат ыарытыйар кырдьа5астарга доруобуйаларын көннөрөр сыалтан улуус балыыһаларыгар эмтэтии, олохтоох балыыһа5а анал куойканы көрүү киллэриллибит. Оскуола үөрэнээччилэрэ көмүс традиция чэрчитинэн тимуровскай көмөлөрү оңороллор. Эргэ оскуола5а кырдьа5астар хосторугар нэдиэлэ5э биирдэ планерка сонуннарын Мотрена Ивановна билиһиннэрэр, истээччилэр санааларын үллэстэллэр. Манна библиотекарь Л.В.Слепцова саңа кинигэлэри, сурунааллары сырдатар. Түмсүү активистара Л.Е.Пестрякова, А.Д.Дмитриева, М.П.Петухова о.д.а инники күөңңэ сылдьаллар. Уус-уран көрүү активистара М.С.Яковлева, А.Н.Олесова, Л.Е.Пестрякова, М.И.Максимова ханнык да үлэттэн туора турбаттар.      

Патриотическай тыыңңа иитиллэн тахсыбыт ытыктыыр киһибит учуутал М.А.Гоголева Кыайыы 70 сылыгар анаан сүңкэн элбэх үлэни көрсөн нэһилиэгин а5а кырдьа5астарын, сэрии-тыыл ветераннарын, үлэ маяктарын сурукка-бичиккэ тиһэн «Барыта Кыайыы туһугар», «Мурчукулар» кинигэлэрэ күн сирин көрөн дьон-сэргэ бол5омтотун тарпыта, олорон ааспыт өбүгэлэрбит, аймахтарбыт сырдык ааттарын үйэтиттэ, үүнэр көлүөнэ ыччакка бэртээхэй өйдөбүнньүк бэлэ5и хаалларда.

«Түһүлгэ» киин эдэр талааннаах специалиһа Т.Е.Быскасова эдэр пенсионердары түмэ тардан үңкүү куруһуогун тэрийэн, дьону сэргэхситтэ, өссө да салгыы үлэлэһиэ диэн эрэллээхтэр.

Мотрена Ивановна 14 сыл устата ис кыа5ын толору ууран бары салаа5а үлэлэстэ, аны эдэрдэргэ суол биэрэрин иһитиннэрдэ. Эдэр пенсионердары общественнай үлэ5э тардар сыалтан, үлэлэһиэ, саңа сүүрээннэри киллэриэ диэн Н.Р.Слепцованы мэктиэлээтэ, символическай бэлиэ туттарда, ситиһиилэри ба5арда.

Биэчэр чэрчитигэр тэрилтэлэр Мотрена Ивановна5а махтанан грамоталары, өйдөбүнньүк бэлэхтэри туттардылар. Нам улууһун кырдьа5астарын түмсүүлэрин аатыттан С.Д.Кобякова грамота, саха ытык иһитин чороон ыыппытын туттардылар.

Хойукка диэри мустубут кырдьа5астары СДК директора, композитор-мелодист А.П.Меркулов истиң ырыаларынан, культура салаатын үлэһиттэрэ э5эрдэ нүөмэрдэринэн киэргэттилэр. Биэчэргэ дуоһуйа сынньаннылар, саңа салайааччыга ситиһиилэри ба5аралларын тиэртилэр. Күөх уот хаһаайката нэһилиэк депутата, нэһилиэк бочуоттаах киһитэ Мотрена Ивановна түбүктээх үлэтэ үрдүктүк сыаналанан Саха Республикатын бочуоттаах ветерана, Кыайыы 70 сылынан юбилейнай мэтээл хаһаайката буолбута.

Ытыктабыллаах Мотрена Ивановна, бочуоттаах сынньалаңңар этэңңэ олор, о5олоргор, сиэннэргэр, аймахтаргар дурда-хахха буол, эдэрдэргэ үтүө сүбэһит, кырдьа5астарга күүтүүлээх ыалдьыт буоларгар уонна чэгиэн чэбдик доруобуйаны ба5арабыт!

Юшкова М.Д. 2 Хомустаах орто оскуолатын учуутала